N’abashumba muri Jenoside yakorewe abatutsi mu Rwanda barakomeretse

Abashumba muri Kiliziya Gatorika no mu matorero yandi yemera Kristu hahita  humvikana ko bashatse kuvuga abasenyeri kandi nibyo ni abashumba, na bo  ubwabo mu nyandiko zinyuranye bandikira abo bayobora basoza bagira bati: 

Musenyeri…………………………………………………....................................  Umushumba wa Diyosezi ya ……………………………………………………. 

Muri iyi nyandiko, abo maze kuvuga haruguru ntabakuyemo, nongeyeho  umuntu wese ufite abo ayobora muri Kiliziya, mu Itorero; n’Umupadiri muri  Paruwasi ni Umushumba, Umuyobozi muri Centrale ayobora ni Umushumba,  Umuyobozi w’Umuryangoremezo ni Umushumba muri uwo muryangoremezo;  Umukristu mu rugo rwe ni Umushumba, Umuyobozi w’iteraniro ryo gusenga ni  Umushumba w’iryo teraniro. Umushumba uvugwa muri iyi nyandiko, ni uwo  wese ufite abo ayobora ku buryo bwa Roho. 

Muri Jenoside yakorewe abatutsi mu Rwanda, abo bashumba banyuranye  barakomeretse. Bamwe mubo bari bashinzwe kuyobora ku buryo bwa Roho,  biroshye kuri bagenzi babo barabica, babica nta kindi babaziza usibye uko  Imana yabaremye. Impinja, ibitambambuga baricwa; abo se na bo bahimbirwe  impamvu bishwe! Kwica umuntu umuziza uko Imana yamuremye ni ukurwanya  Imana yaremye abantu. Abantu bishe bagenzi babo muri Jenoside yakorewe  abatutsi, bajye bamenya icyaha cyabo, barwanyije Imana yaremye abantu.  “Imana irema umuntu mw’ishusho ryayo“. Intangiriro 1, 27. Ntibafitanye  ibibazo n’abantu gusa, bafitanye ibibazo bwa mbere n’Imana yaremye abantu. 

Abakoreye Jenoside abatutsi n’ibibazo bafitanye n’Imana 

Barwanyije Imana: Uwo bitaga umututsi mu gihe cya Jenoside, ntiyari  yarabihisemo, ntiyari yarabiharaniye, yari yarisanze atyo avuka, ku muziza uko  Imana yamuremye ni ukurwanya Imana yaremye abantu. 

Bahutaje urukundo: Muri Jenoside yakorewe abatutsi hagaragajwe ubugome  burenze ubwenge bwa muntu, benshi mu bakoze ibyo ubasanga mu bakristu.  Ubundi umukristu ni umuhamya w’urukundo rw’Imana mu bantu.  

Bakomerekeje abashumba: bamwe mu bashumba bazize Jenoside yakorewe  abatutsi, abayirokotse basigarana ibikomere ku mutima. Tekereza umupadiri  muzima, pasitoro mw’itorero bigishaga urukundo, bakarwerekana mu buzima  bwabo, bagatungurwa no kubona mu bayoboke mu madini yabo biroha muri  Jenoside, bakica abatutsi, nta kindi babaziza usibye uko baremwe, Padiri na 

Pasitoro na bo ubwabo bakicwa n’intama zabo. Umuntu yibaza niba mu gihe  abatutsi bicwaga muri Jenoside barya bicaga bari bakiri intama! Abashumba  bariho mu gihe abatutsi bakorerwaga Jenoside ndavuga cyane abapadiri,  abapasitoro, simvuga abatutsi gusa, ndavuga uwo wese warufite abo Nyagasani  yamuragije kuyobora yaba umututsi cyangwa umuhutu, bose barakomeretse.  Intama zahindutse ibirura imbere yabo, birabatungura. Kubona nta Paruwasi  n’imwe mu Rwanda yarokotse ngo abatutsi be gukorerwa Jenoside?! Kubona  nta torero na rimwe rya kivuga ibigwi ngo twe abayoboke bacu ntibakoreye  abatutsi Jenoside!! Ibi byakomerekeje abashumba, uwakomeretse ku mutima  ibikomere bye bikizwa n’uko aganiriye n’uwamukomerekeje. 

Abari abashumba mu gihe abatutsi bakorerwaga Jenoside barebe uko bazasubira  mu ntama Nyagasani yari yarabaragije, baganire na zo nta buryarya, babwizanye  ukuri.“Ni iki ntakoze nagombaga gukora nk’umushumba bityo bikaba  byaratumye Jenoside y’abatutsi ishoboka mu bushyo narinshinzwe gukenura!„ 

Nibakikwereka kubasaba imbabazi bizakomora ibikomere; niba Umushumba  yarakoze neza ibyo yagombaga gukora hakaba harabaye abamuca inyuma  bagatuma izo yararagiye zona, izo ntama na zo zigombe zisabe umushumba  imbabazi, ibi bizazomora ibikomere, byongere byomore n’ibikomere  by’umushumba. 

Abashumba bari bafite ubushyo baragijwe mu gihe abatutsi bakorerwaga  Jenoside mu Rwanda bagendana ibikomere, abo baribashinzwe kuyobora na bo  bafite ibyabo.  

Umuti wa byo uri mu guhura bakaganira. Bamwe ntibarota basubira aho bari  bari mu gihe abatutsi bakorerwaga Jenoside; abongeye kuhatumwa ntibatinyutse  kugira icyo baganira kubyerekeye Jenoside yakorewe abatutsi; abandi bo  bahungiye kure mu mahanga, nyamara umuntu asiga ikimwirukaho, ntasiga  ikimwirukamo. 

Jenoside yakorewe abatutsi mu Rwanda, yakomerekeje n’abashumba, na bo  bakeneye gukorana urugendo rw’Ubumwe n’Ubwiyunge n’abo bayoboraga  bakazarusoza bahana imbabazi, basabana imbabazi. 

Ngiyo inzira yo gusenyera sekibi y’ikinyoma n’uburyarya;  Ngiyo inzira yo gukira ibikomere.  

 Padiri Ubald RUGIRANGOGA  Ibanga ry’Amahoro 

 Diyosezi ya CYANGUGU